wo zist jo lazzat-kash-e-alam rahi hai
wo zist tere nam se mansub hui hai

kyon hijr ki shab mahki tere qurb ki khushbu
kya koi kali yaad ke gulshan mein khili hai

ai guzre hue lamho koi naqsh ubhaaro
aaina-e-takhyil pe ab gard jami hai

ek hum hain ki khak-e-rah-e-jaanan mein abhi tak
ek wo hain ki un ki wahi begana-rawi hai

ai gardish-e-ayyam koi zakhm naya aur
ek mod pe ab ‘umr-e-rawan thahr gai hai

rudad-e-gham-e-dil main sunaun tujhe kyunkar
main dekh raha hun teri aankhon mein nami hai

ab guzre hue waqt ka kuchh zikr na chhedo
mushkil se tabi'at meri qabu mein hui hai

muddat se kisi dard ka tohfa nahin aaya
ya gardish-e-ayyam hamein bhul gai hai

ai baad-e-sahar aaj to chup-chap guzar ja
hone de zara der abhi aankh lagi hai

mai lao ghazal gao qarib aao shab-e-mah
sharminda nigahon se hamein dekh rahi hai

mat puchh ki kya hum pe guzarti hai tere ba'd
baithe hain jahan subh wahin sham hui hai

hai awwal-e-shab bazm mein rang aakhir-e-shab ka
kya sham' koi waqt se pahle hi bujhi hai