sho'la hai na aansu hai na shabnam na saba hai
'mumtaz' meri zat faqat harf-e-wafa hai

jo barq bhi girti hai guzarti hai idhar se
aalam ne shayad mera ghar dekh liya hai

guzre hain faqat ek hamin dasht-e-bala se
amboh-e-rafiqan to kahin thahr gaya hai

kuchh zakhm chhupae hain zamane ki nazar se
kuchh chaak hain aise jinhen ek 'umr siya hai

gham ho ki sukun ho hamein jina hai bahar-taur
marne ka ye andaz bhi kya khub raha hai