shor-sharaba chhod ke pahuncha virani tak
chalte chalte chhut gaya dana-pani tak

aag ne mujh se hath milaya ghar aa baithi
aankhen phade dekh rahi hai hairani tak

dub gae to sari duniya bura kahegi
dekho mujh mein paon na rakhna tughyani tak

itna aasan to nahin us ka wapas hona
bech ke iman pahuncha hai be-imani tak

subh ko uth kar dekha to mujh par raaz khula ye
chand ki sari shohrat hai bas tabani tak

hum to hum hain tajwaron par roab wo chhaya
paon pe us ke rakh diye taj-e-sultani tak

aag dar-o-diwar khirad ko rakh banae
kuchh na bache to hum ko pahunchae pani tak

sharm se koi marna chahe to bhi kare kya
'yawar' ab nayab hai chullu-bhar pani tak