tadapte rahte hain pani ke dhaare apni jagah
jame hue hain nadi ke kinare apni jagah

nigar-e-shab ki subuk-gamiyon pe marte hue
ragon mein daud rahe hain sharare apni jagah

shua-e-mahr bujhane mein ho gai nakaam
chamak rahe hain falak par sitare apni jagah

kahan wo aanch jo us ke khayal se nikle
wo husn apni jagah ye nazare apni jagah

badan samet ke dekha jo us ne meri taraf
simat ke rah gae sab istiare apni jagah

aham hain khama-e-dil ki nigarishen lekin
nigah-e-yar ke 'yawar' shumare apni jagah