shua-e-samt-e-safar ko nazar mein rakhna hai
talatum aur bhanwar ko nazar mein rakhna hai

hain rah mein khas-o-khashak ke pahad to kya
tilism-e-barq ko apne hunar mein rakhna hai

shiar-e-chob-e-qalam shewa-e-asa-e-kalim
shua-e-tur ko tar-e-nazar mein rakhna hai

nae tabuk ne an-gin mahaz khole hain
abhi gunah-e-qadam apne ghar mein rakhna hai

shabon ke pas rahe ghaar-e-saur ka tiryak
hira ka nur numud-e-sahar mein rakhna hai

phir us ada se khulen zehn-o-dil ke darwaze
usi nasim-e-ukhuwwat ko sar mein rakhna hai

dubo rahi hai tahi sipiyon ki nadani
sadi ke jal ko pal pal nazar mein rakhna hai

kabhi hai dhup kabhi fikr chandni hai 'matin'
tajalli-zar-e-ghazal ko safar mein rakhna hai