shukr-e-parwardigar karta hun
aur lail-o-nahaar karta hun

jo har ek taur se munasib ho
wo rawish ikhtiyar karta hun

sari duniya se wasta hai mujhe
sari duniya ko pyar karta hun

phul to phul hain kali to kali
main to kanton se pyar karta hun

main har ek shakhs ko zamane mein
khud se behtar shumar karta hun

tu mera eatibar kar na saka
main tera eatibar karta hun

arz-e-gham un se kar nahin pata
hausla bar bar karta hun

meri himmat ko dad de tujh par
apni hasti nisar karta hun

pahle thi fikr-e-in-o-an 'manzil'
ab to fikr-e-mazar karta hun