sinaon kis tarah un ko hai kaisi dastan meri
kabhi meri zaban un ki kabhi un ki zaban meri

hamesha zindagi zer-o-zabar bardasht karti hai
guzarti ja rahi hai is tarah umr-e-rawan meri

banaya mo'atabar insan ko jis ne sajda karne par
main be-bahra rahun us se ye himmat hai kahan meri

teri ghatti hui shohrat mujhe aagah karti hai
kahin barson ki mehnat ho na jae raegan meri

haqiqat mein mohabbat zindagi ka ek qarina hai
na bikhri aaj tak zebaish-e-kaun-o-makan meri