sirat achchhi hai teri yar jamal achchha hai
tu bahar-taur bas ai nek-khisal achchha hai

be-qarari hai wo agli si na wo dard-e-jigar
ab to kuchh kuchh tere bimar ka haal achchha hai

kab tere khal-e-munawwar se hain tare achchhe
kab tere abru-e-pur-kham se hilal achchha hai

dekh kar aaine mein qamat-e-abru se kaha
gulshan-e-dahr mein ek ye hi nihaal achchha hai

ek bosa pe jo dil deta hai 'sabir' le lo
mol kam hai magar ai jaan ye mal achchha hai