sirf aazar uthane se kahan banta hai
mujh sa uslub zamane se kahan banta hai

aankh ko kat ke kuchh nok-palak sidhi ki
zawiya sidh mein aane se kahan banta hai

kuchh na kuchh is mein haqiqat bhi chhipi hoti hai
waqia baat banane se kahan banta hai

husn-e-yusuf si koi jins bhi rakkho is mein
warna bazar sajaane se kahan banta hai

is mein kuchh wahshat-e-dil bhi to rakhi jati hai
bagh bas phul ugane se kahan banta hai

rasta banta hai tashkil-e-nazar se 'babar'
khak ki khak udane se kahan banta hai