sitam ki tegh chali tir bhi jafa ke chale
jo baat haq thi sar-e-dar hum suna ke chale

kuchh aisi dur na thin manzilen mohabbat ki
wufur-e-shauq mein hum fasle badha ke chale

jo aab-o-dana chaman se utha chaman walo
har ek shakh pe hum aashiyan bana ke chale

uthe to mahfil-e-rindan se tishna-kaam magar
qadam qadam pe hum ek mai-kada bana ke chale

sulag sulag ke rahe jo diya bujha na sake
gae to jate hue aag wo laga ke chale

'khayali' sher hai kya ye to ahl-e-fan jaanen
hum apne dil ki ba-shakl-e-ghazal suna ke chale