tamam umr kabhi mujh se hal hua hi na tha
wo masala jo haqiqat mein masala hi na tha

badan se jis ki thakan aaj tak nahin utri
main us safar pe rawana kabhi hua hi na tha

kuchh is liye bhi mujhe hijr mein suhulat hai
tera visal kabhi mera muddaa hi na tha

badan ka bhed khula hai tera badan chhu kar
ye misra mujh pe wagarna kabhi khula hi na tha

isi liye to mujhe lautna pada 'sayyad'
ki mere pas koi aur rasta hi na tha