sitara-war jale phir bujha diye gae hum
phir is ke baad nazar se gira diye gae hum

aziz the hamin nau-waridan-e-kucha-e-ishq
so pichhe hatte gae rasta diye gae hum

shikast o fath ke sab faisle hue kahin aur
misal-e-mal-e-ghanimat luta diye gae hum

zamin farsh-e-gul-o-lala se sajai gai
phir is zamin ki amanat bana diye gae hum

duaen yaad kara di gai thin bachpan mein
so zakhm khate rahe aur dua diye gae hum