siyah raat ki sab aazmaishen manzur
kisi sahar ke ujale ka aasra to mila

nazar mila na sake hum se wo to gham kya hai
ki dil se dil ke dhadakne ka silsila to mila

hai aaj aur hi kuchh zulf-e-tabdar mein kham
bhatakne wale ko manzil ka rasta to mila

sarishk-e-chashm se moti bahut lutae gae
teri nigah ke shahidon ko khun-baha to mila

jahan nigah se insan banae jate hain
wo bab-e-mai-kada mere liye khula to mila

sitam-zarif mohabbat ko jurm kahte hain
gunah-gar ko jine ka aasra to mila

na rahnuma hai na manzil dayar-e-ulfat mein
qadam uthate hi khizr-e-shikasta-pa to mila

mere junun ne khilae hain phul sahra mein
mere junun se bahaaron ko hausla to mila

samajhte the ki wafa-na-shanas hai duniya
'surur' hum ko bhi ek dard-ashna to mila