soz-e-jigar ka haal kisi par ayan na ho
jalta rahun us aag mein lekin dhuan na ho

patthar wo dil hai jo na ho tera asir-e-zulf
wo aankh kya jo tere liye khun-chakan na ho

auron ki tarah jalwa-e-didar ke liye
ya-rab mujhe quyud-e-zaman-o-makan na ho

meri zaban-e-haal mera tarjuman bane
khuddariyon pe minnat-e-nutq-o-bayan na ho

aane ko lab pe shikwa-e-jaur-o-jafa ho jab
us din khuda kare mere munh mein zaban na ho

waiz rahin-e-kaba barahman hai waqf-e-dair
tum jalwa-gar batao kahan ho kahan na ho

kya shustagi ho us ke mazamin mein 'jalal'
jis ko nasib sohbat-e-ahl-e-zaban na ho