sozish-e-abla-pai nahin sunne wala
rasta koi duhai nahin sunne wala

aisi aawazon ki zad mein hai samaat us ki
wo sada koi parai nahin sunne wala

bas yahi shai hai zamane mein mujhe sab se aziz
main mohabbat ki burai nahin sunne wala

wasl ko chhod ke hain sari dalilen bekar
hijr ab koi safai nahin sunne wala

guftugu kije magar soch-samajh kar kije
har koi harza-sarai nahin sunne wala

sab ke sab aadi hue zauq-e-asiri ke yahan
koi paigham-e-rihai nahin sunne wala

shikwa-e-zakhm-e-jigar us se kiya hai 'dilbar'
wo magar dard-e-judai nahin sunne wala