sukh ki bohtat hai zindagi zakhm de
mera dukh bant kar phir koi zakhm de

justuju phir koi dil mein rasta bana
phir se nakaamiyon ka wahi zakhm de

raushni ho nazar-dar-nazar raushni
ek kami hai kami-dar-kami zakhm de

gum-shuda chahaton ka wazifa padha
bolte manzaron ki gali zakhm de

tu mujhe zindagi ka qarina sikha
mujh pe ehsan kar dil-lagi zakhm de

dard ka zaiqa bhul baitha hun main
aisa kar tu mujhe is ghadi zakhm de

nutq-e-'adil' ki shirini kam ho zara
talkhi-e-hijr ki bekali zakhm de