sukun-e-dil ho magar tum bacha sake na mujhe
dalil-e-dard-e-jigar tum bacha sake na mujhe

tumhi safina tumhi na-khuda tumhi sahil
main dubta hun magar tum bacha sake na mujhe

kisi ke dast-e-shifa kaise mere kaam aaen
mere tabib agar tum bacha sake na mujhe

hun shab-gazida gham-e-dil bichhad gae tum bhi
mere sharik-e-safar tum bacha sake na mujhe

lage hain dil pe mere chaarasaz tir-e-bala
tumhi the sina-sipar tum bacha sake na mujhe

koi na dekh saka hai mera ye soz-e-darun
tumhi the ahl-e-nazar tum bacha sake na mujhe

parai aag mein andar se jal raha hun main
mere chinar-shajar tum bacha sake na mujhe