sukun-e-qalb ki daulat kahan duniya-e-fani mein
bas ek ghaflat si ho jati hai aur wo bhi jawani mein

teri pakiza surat kar rahi hai husn-e-zan paida
magar aankhon ki masti dalti hai bad-gumani mein

habab apni khudi se bas yahi kahta hua guzra
tamasha tha hawa ne ek girah de di thi pani mein

kamar ka kya hun 'ashiq khul gai zulf-e-daraaz un ki
kamar khud pad gai hai ek bala-e-asmani mein

usi surat mein dilkash khubi-e-alfaz hoti hai
ki husn-e-yar ka paida kare jalwa ma'ani mein

ada-e-shukr kar ke ehtiraaz aula hai ai 'akbar'
hazaron aafaten shamil hain un ki mehrbani mein