sukun nasib na ho dur iztirab na ho
wo dard de mujhe jis ka koi jawab na ho

husul-e-hasil-e-ulfat mein yun kharab na ho
fuzul dil kahin wabasta-e-azab na ho

sharab-e-nab ki har mauj par mujhe shak hai
kisi hasin ka machalta hua shabab na ho

utha ba-shauq qadam tishna-kaam-e-wadi-e-ishq
teri nigah ka hasil kahin sarab na ho

kisi ke tir-e-nazar dil mein is ada se chubhen
ki zakhm gahre paden dil mein iztirab na ho

ye dil-farebi-e-har-barg-e-gul are tauba
jamal-e-naz ki bikhri hui kitab na ho

jawab-e-arz-e-tamanna se dil raha mahrum
wo kya sawal jo sharminda-e-jawab na ho

jamal-e-tur jise kah rahe hain ahl-e-jamal
kahin wo husn ka ek partaw-e-naqab na ho

wafa ka shisha-e-dil bhi hai kitna nazuk sa
ajab hunar hai ki is ka koi jawab na ho

jahan-e-dil ka jo zarra hai wo munawwar hai
wo dagh-e-dil nahin jo rashk-e-aftab na ho

mizaj-e-husn haqiqat mein ek qayamat hai
kisi ke shauq mein insan koi kharab na ho

nigah-e-shauq 'ziya' hum use na manenge
jo bargah-e-tajalli mein baryab na ho