sukut-e-shab se ek naghma suna hai
wahi kanon mein ab tak gunjta hai

ghanimat hai ki apne gham-zadon ko
wo husn-e-khud-nigar pahchanta hai

jise kho kar bahut maghmum hun main
suna hai us ka gham mujh se siwa hai

kuchh aise gham bhi hain jin se abhi tak
dil-e-gham-ashna na-ashna hai

bahut chhote hain mujh se mere dushman
jo mera dost hai mujh se bada hai

mujhe har aan kuchh banna padega
meri har sans meri ibtida hai