sukut todne ka ehtimam karna chahiye
kabhi-kabhaar khud se bhi kalam karna chahiye

adab mein jhukna chahiye salam karna chahiye
khirad tujhe junun ko imam karna chahiye

ulajh gae hain sare tar ab mere khuda tujhe
tawil dastan ka ikhtitam karna chahiye

tamam log nafraton ke zahr mein bujhe hue
mohabbaton ke silsilon ko aam karna chahiye

mere lahu tu chashm aur ashk se gurez kar
tujhe ragon ke darmiyan khiram karna chahiye