sunaen kaise sar-e-bazm khar hone ka dukh
aur ek bar nahin bar bar hone ka dukh

tera habib na hone ke dukh pe bhaari hai
tere raqibon mein apna shumar hone ka dukh

hum apne shahr mein rah kar bhi roz sahte hain
hiran ka sher se aise shikar hone ka dukh

har ek sans pe be-maut marta hai mujhe
ye pak-damani mein dagh-dar hone ka dukh

hamari apni koi samt tak nahin yaro
yahi hai rah ka udta ghubar hone ka dukh

akela tu hi nahin dosti ka bojh liye
hamare sath bhi hai gham-gusar hone ka dukh