suni sunai wo aawaz mar hi jaane do
sadi ka gham hai to lamhe bikhar hi jaane do

main apni jaan ki bazi lagae baitha hun
har ek bala mere sar se guzar hi jaane do

lahu ke chhinton se ho jaegi faza gulnar
hamare sine mein khanjar utar hi jaane do

ye intishaar ka aalam ye pur-khatar mahaul
azizo kakul-e-giti sanwar hi jaane do

tumhein bhulane se dil ko sukun milta hai
tum apni yaadon ke ye zakhm bhar hi jaane do

'habab' sab ke liye ek dars-e-ibrat hai
use bhi chand ghadi ko ubhar hi jaane do