sunsan raste na the viran ghar na the
jab hum the shahr mein to ye sham-o-sahar na the

allah re ye aalam-e-ghurbat ye bebasi
hum bekason ke jaise kabhi apne ghar na the

zulmat-shikan junun ke ujale gawah hain
hum the nawed-e-subh talash-e-sahar na the

simten to musht-e-khak hain phailen to kaenat
idrak se buland kab aashufta-sar na the

hum ko mita saka na kisi ahd ka yazid
hum sidq the fasana-e-na-mo'atabar na the

zindan hai ya fasil-e-chaman kis ko hosh tha
tarik shahr tha kahin diwar-o-dar na the