surkh aankhen hain zard manzar hai
zindagi ret ka samundar hai

surat-e-haal puchh lo hum se
dil hai ghamgin aankh bhi tar hai

kaise manzil na ho qarib mere
jab mera hi shuur rahbar hai

main ye khud bhi nahin samajh paya
qarz kis ki nazar ka mujh par hai

main andheron mein kho nahin sakta
ishq se dil mera munawwar hai

ru-ba-ru aaine ke mat jaana
hath mein aaine ke patthar hai

ek tufan hai us ki khamoshi
zindagi us ki ek samundar hai

rab salamat rakhe khudi meri
ye imarat bhi aaj jarjar hai

jis ka hota nahin dilon mein qiyam
aadmi wo 'adib' be-ghar hai