ta hashr rahe ye dagh dil ka
ya-rab na bujhe charagh dil ka

hum se bhi tunak-mizaj hai ye
pate hi nahin dimagh dil ka

yan aatish-e-ishq se shab o roz
dahke hai pada ayagh dil ka

us rashk-e-chaman ki yaad mein hai
shadab hamesha bagh dil ka

jine ka maza usi ko hai bas
jis shakhs ko ho faragh dil ka

hai baada-e-gham se tere din raat
labrez yahan ayagh dil ka

malum nahin kisi ko 'rangin'
de kaun hamein suragh dil ka