tabiat in dinon auham ki un manzilon par hai
dil-e-kam-hausla kaghaz ki gili kashtiyon par hai

guzashta mausamon mein bujh gae hain rang phulon ke
daricha ab bhi mera raushni ke zawiyon par hai

hazaron aabnusi jangalon ka husn kya mani
hamein jab sans lena kimiyai tajrabon par hai

kadha hai meri ajrak par balochi kaam shishe ka
kisi ke aks ki qaus-e-quzah sab aainon par hai

mere aangan mein ek nannhi gilahri ka basera hai
bahut masum sa ek naqsh meri kyariyon par hai

main us par apne andar ki humaira war aati hun
magar wo be-yaqini mein abhi pahli hadon par hai