tadap hayat se baham nahin to kuchh bhi nahin
khushi ke sath agar gham nahin to kuchh bhi nahin

hazar roiye haal-e-tabah par apne
kisi ki aankh agar nam nahin to kuchh bhi nahin

tumhaari baat masiha-sifat sahi lekin
hamare zakhm ka marham nahin to kuchh bhi nahin

ghalat hai khun ke aansu bahana marne par
jo zinda lash ka matam nahin to kuchh bhi nahin

hazar rang se mahfil saja ke tum dekho
tumhaare sath agar hum nahin to kuchh bhi nahin

chaman ko naz na ho jis pe wo bahaar hi kiya
agarche phul pe shabnam nahin to kuchh bhi nahin

'nazar' zarur hai hathon mein un ke jam magar
'nazar' mein kaif ka aalam nahin to kuchh bhi nahin