tadap raha hai dil-e-be-qarar aa jao
bas ek bar ai jaan-e-bahaar aa jao

tumhaare aane se laut aaegi chaman mein bahaar
khizan udane lagi hai ghubar aa jao

laga di aag gulistan mein dushmanon ne magar
bujhaen aag jo hain jaan-nisar aa jao

hain ghar ke sare dariche hi wa tumhaare liye
tasawwuraat ki duniya mein yar aa jao

na chhut jae kahin ab ye zabt ka daman
na jao ruth ke jaan-e-bahaar aa jao

sahar ka tara bhi 'shahin' kah raha hai yahi
guzar na jae shab-e-intizar aa jao