tahrir badalti hai taqdir badalti hai
mahaul badalne se tadbir badalti hai

jab rang badalta hai us chashm-e-fusun-gar ka
har jura-e-sahba ki tasir badalti hai

ye kya teri nisbat se har shai mein talawwun hai
har lamha tere gham ki taswir badalti hai

hota hai ek arsa tak jab khun tamanna ka
tab khwab-e-mohabbat ki tabir badalti hai

wo kuchh bhi kahen lekin main khub samajhta hun
ek jumbish-e-mizhgan se taqdir badalti hai

aazadi ke diwane qaidi ko khabar de do
hoti hai rihai kab zanjir badalti hai