talkh kar len zindagi kyon fikr-e-mustaqbil se hum
baz aae is junun-e-sai-e-la-hasil se hum

ye haram ye dair ye hosh-o-khirad ki gumrahi
har qadam kuchh dur hi hote gae manzil se hum

intiha-e-shauq mein dube hue khoe hue
teri mahfil mein bhi kitni dur hain mahfil se hum

hasrat-e-sahil bhi thi tufan se jab tak dur the
dub kar ubhre to ab bezar hain sahil se hum

ye musalsal be-hisi uftadgi farsudgi
khub hain tufan mein 'qaisar' duri-e-sahil se hum