talkhi-e-jabr-e-musalsal se bhare hain hum log
lao koi bhi kasauti ki khare hain hum log

dekhte sab hain magar koi nahin takraata
dahr mein surat-e-kohsar dhare hain hum log

wo mah-o-mehr tarashe the hamin ne ek din
in dinon jin ke ujalon se pare hain hum log

wadi-e-shauq mein kante to nahin takrae
han koi phul uda hai to dare hain hum log

aaj bhi tesha-e-ayyam ki zad par 'ishrat'
kasa-e-qais ki manind dhare hain hum log