talkhi-e-mai talkhi-e-haalat ki tauhin hai
nashshe mein sach bolna sach baat ki tauhin hai

gar nahin hai aaina patthar utha lo dosto
yunhi khali hath phirna hath ki tauhin hai

aadmi hi aadmi se baat karta hai janab
baat karne mein bhala kis baat ki tauhin hai

aap ne taswir khinchwai madad karte hue
ye to kar-e-khair ki khairaat ki tauhin hai

pas baithe dur takna wo bhi khamoshi ke sath
ye to hanste bolte lamhat ki tauhin hai

dil pe chhana aur aankhon mein na aana baadalo
ye to sawan ki hatak barsat ki tauhin hai

bais-eazaz hai dariya mein milna qatre ka
kaun kahta hai mohabbat zat ki tauhin hai