tamam dard kisi lai mein gungunate hue
wo kho gaya kahin shiw-ranjini sunate hue

qusur waqt ka laila ka tha na duniya ka
wo qais tha jo raha bar-e-jaan uthate hue

hamin ne chaar girah rang rakh diya dar par
hamin ne yaad kiya khushbuon ko jate hue

dhuen mein ho gai tabdil rang-o-bu kho kar
bayar sabz banon se nagar ko aate hue

ai zindagi kabhi inkar ka sabab bhi sun
main thak gaya hun teri han mein han milate hue