tamam umr mujhe us ki aarzu thahri wo ek shakhs adawat hi jis ki khu thahri jhuki to uth na saki sharm se nigah-e-talab ye aur baat ki phir bhi wo surkh-ru thahri mere labon se udasi magar na chhut saki hazar saat-e-dushwar khush-gulu thahri latif subh ki thandak hai zindagi teri meri hayat bhari dopahar ki lu thahri use utar ki ab sath ye nahin degi qaba-e-kohnagi sharminda-e-rafu thahri 'nasim' raat thithurti hai ja ke so jao badan mein ab wo kahan garmi-e-lahu thahri