tamhid-e-sitam aur hai takmil-e-jafa aur
chakhne ka maza aur hai pine ka maza aur

donon hi bina-e-kashish-o-jazb hain lekin
naghmon ki sada aur hai nalon ki sada aur

ai fitrat-e-gham zist hi kya kam thi musibat
nazil hui is par ye mohabbat ki bala aur

takra ke wahin tut gae shisha-o-saghar
mai-khwaron ke jhurmut mein jo saqi ne kaha aur

wo khud nazar aate hain jafaon pe pasheman
kya chahiye ab tum ko 'shakil' is ke siwa aur