tandurusti di khuda ne to naqahat na gai
yani tauba se bhi isyan ki nadamat na gai

shaikh-ji mahfil-e-rindan se ye kahte nikle
shukr-sad-shukr ki bazar mein izzat na gai

nam baqi hai zamana mein to bhar paya
gae mardan-e-khuda khalq se shohrat na gai

kis ka jalwa nazar aaya tha use roz-e-azal
aaj tak nargis-e-bedar ki hairat na gai

mar gaya mar ke bhi thandi na hui lash mari
soz-e-furqat ki magar dil se hararat na gai

zard nuqra nahin insan ki tarah murda-pasand
jo gaya qabr mein tanha gaya daulat na gai

hur jo tujh se mushabah thi usi ko dekha
marne ke baad bhi zalim teri ulfat na gai

nafas bahkata hai piri mein to kahta hun 'sakha'
kyun ba-shaitan teri ab bhi shararat na gai