tanha na dil hi lashkar-e-gham dekh tal gaya
is marke mein pa-e-tahammul bhi chal gaya

hain garm-e-guftugu gul o bulbul chaman ke bich
hoga khalal saba jo koi pat mil gaya

us shama-ru se qasd na milne ka tha hamein
par dekhte hi mom-sifat dil pighal gaya

munim tu yan khayal-e-imarat mein kho na umr
le kaun apne sath ye qasr-o-mahl gaya

lagi na ghair-e-yas hina-e-umid hath
duniya se jo gaya kaf-e-afsos mal gaya

us rah-rau ne dam mein kiya tai rah-e-adam
hasti ke sang se jo sharar sa uchhal gaya

dekha har ek zarre mein us aaftab ko
jis chashm se ki be-basari ka khalal gaya

guzri shab-e-shabab hua roz-e-sheb akhir
kuchh bhi khabar hai qafila aage nikal gaya

qabil maqam ke nahin 'bedar' ye sarae
manzil hai dur khwab se uth din to dhal gaya