tanhai mil saki na ghadi bhar kisi ke sath
saya bhi mere sath raha raushni ke sath

raushan hua na koi daricha mere baghair
ek rabt-e-khas rakhta hun main us gali ke sath

do din ki zindagi mein bhi dhadka tha hashr ka
karte rahe gunah magar be-dili ke sath

main be-amal tha fard-e-amal kaise ban gai
kaisa mazaq hai ye meri bebasi ke sath

main us ko chhod sakta hun 'tahir' na wo mujhe
ek zindagi bandhi hai meri zindagi ke sath