tanhaiyan jo ras na aaen to kya karen
zakhmon ki anjuman na sajaen to kya karen

is daur-e-kashmakash mein mohabbat ka nam bhi
danista log bhul na jaen to kya karen

ek aasra to chahiye jine ke waste
haalat ka fareb na khaen to kya karen

dil bhi yahan bahut hain sawalat bhi bahut
lekin koi jawab na paen to kya karen

waqif hain hum bhi ishq ke aadab se magar
diwana khud hi log banaen to kya karen

viran hai pahli sham se maqtal ke raste
ghabra ke mai-kade ko na jaen to kya karen

dam ghut rahe hain talkh haqaeq ke zahr se
khwabon ki bastiyan na basaen to kya karen

duniya ke har fareb ko ehsan man kar
duniya ka hausla na badhaen to kya karen

tafsir-e-kaenat to aasan hai 'rais'
apne hi dil ka raaz na paen to kya karen