tarz jine ke sikhati hai mujhe
tishnagi zahr pilati hai mujhe

raat bhar rahti hai kis baat ki dhun
na jagati na sulati hai mujhe

aaina dekhun to kyunkar dekhun
yaad ek shakhs ki aati hai mujhe

band karta hun jo aankhen kya kya
raushni si nazar aati hai mujhe

koi mil jae to rasta kat jae
apni parchhain daraati hai mujhe

ab to ye bhul gaya kis ki talab
des pardes phiraati hai mujhe