tera ghurur-e-abas intihai sath pe hai
bulandi par bhi wahi hai jo khai sath pe hai

phalang sakta hun jitna hai do dilon ke beach
magar jo fasla jughrafiyai sath pe hai

mujhe nahin hai zara ranj tah-nashini ka
mujhe khushi hai chalo mera bhai sath pe hai

hum aise dekhne walon ka koi dosh nahin
ki zer-e-sath kasafat safai sath pe hai

ye kis hunar se kiya tum ne khud ko sair ai dost
ki dudh pi bhi liya aur malai sath pe hai