tere bimar ko nind aai hai
ab kahan waqt-e-masihai hai

kaun aalam hai jo maujud nahin
kya yahi aalam-e-tanhai hai

aap ki samt nahin ru-e-sukhan
baat mein baat nikal aai hai

hans rahe hain meri tanhai par
in sitaron ki bhi ban aai hai

aap diwana samajhte hain mujhe
aap ki hausla-afzai hai

ye kahan ahl-e-khirad ko malum
kitni nadan pe danai hai

ai 'shamim' aap ko malum nahin
kaun neki hai jo kaam aai hai