tere dar pe jalwa jo hum dekhte hain
khuda ki khudai mein kam dekhte hain

jo hum shab ko khwab-e-adam dekhte hain
to har samt sair-e-iram dekhte hain

pas-e-marg khalwat mein baithe hain aise
na wo dekhte hain na hum dekhte hain

tumhaari si surat tumhaari si sirat
hasinon ke jamghat mein kam dekhte hain

nazar ki nazar se hai hasrat bhara dil
nazar bhar ke un ko na hum dekhte hain

na manunga jage kahen raat bhar ho
bhari nind aankhon mein hum dekhte hain

shab-e-hijr rote guzarti hai 'shabnam'
fana hi fana subh-dam dekhte hain