teri abru pe sanam kya hi ye khal achchha hai
aise kaba ke liye ye hi bilal achchha hai

dil mera dekh ke munh pher ke nafrat se kaha
ye to kuchh bhi nahin sunte the ki mal achchha hai

ghair ke sath wo aate hain ayaadat ke liye
un se kah de koi ja kar mera haal achchha hai

aaj us but ko dikha lae tujhe ai waiz
ab na kahna kabhi huron ka jamal achchha hai

jam-e-jam chahiye 'shabnam' ko na ai pir-e-mughan
jald de bhar ke yahi jam-e-sifal achchha hai