tere hathon se mitega naqsh-e-hasti ek din
badh rakh degi chhuri par tez-dasti ek din

teri aankhon se dil-e-nazuk girega nashshe mein
taq se shisha gira degi ye masti ek din

zahido puja tumhaari khub hogi hashr mein
but bana degi tumhein ye haq-parasti ek din

aankhen dozakh mein bhi senkega tera dil-sokhta
aag ban jaegi ye aatish-prasti ek din

khubi-e-shamshir-e-abru ka tamasha dekhte
donon bagon aap ki talwar kasti ek din

khun mera raegan nahaq bahate hain huzur
karni hai rang-e-hina ki pesh-dasti ek din

jild-e-pistan tak mera kab tak na hoga dastaras
in turanjon ki bhi qimat hogi sasti ek din

zulf-e-kafir-kesh liptegi qadam se ai sanam
hindu-e-shab bhi karega but-parasti ek din

jaan bakhsho sar mere lashe ka thukrao kabhi
saghar-e-khali mein bhar do shahd-e-hasti ek din

nilgun kar denge mal kar chhatiyan ai rashk-e-mehr
teri angiya ki katori hogi jasti ek din

khub kar tarif-e-nawwab-e-zafar-jang ai 'munir'
kaam aa jaegi ye aaqa-parasti ek din