tere khayal se dilchaspiyan banate hain
waraq pe dil ke chalo titliyan banate hain

safar hayat ka behad hasin guzrega
ana ko mar ke baisakhiyan banate hain

main jaanta hun ye dariya nahin hai sahra hai
to ret par hi chalo machhliyan banate hain

utha hi li hai jo diwar tum ne aangan mein
to bhai is mein chalo khidkiyan banate hain

khulega is tarah qismat ka band darwaza
jo kawishon ki agar chabiyan banate hain

hamari rah mein hail hui hai jo 'khalid'
usi chatan se ab sidhiyan banate hain