tere maikhane mein aise bahut mai-khwar baithe hain mai-e-hasti jo pi kar saqiya bezar baithe hain tadapta hun to mujh ko zindagi ka lutf aata hai na jaane sar jhukae kyon mere gham-khwar baithe hain nazar aati hai barq-e-tur maikhane mein ai zahid magar dair-o-haram mein talib-e-didar baithe hain dil-e-pur-dagh ko dekho na tum chashm-e-hiqarat se liye pahlu mein hum ek gulshan-e-be-khar baithe hain hukumat ki ye khubi hai ki apni khubi-e-qismat hamare mulk mein ahl-e-hunar be-kar baithe hain haram hai rah jannat ki meri jannat hai mai-khana wahan din-dar baithe hain yahan mai-khwar baithe hain