ye sim-o-zar to hain aasaish-e-jahan ke liye mujhe hai gham ki zarurat sukun-e-jaan ke liye nirala meri fughan ka hai dosto andaz main kar raha hun fughan rukhsat-e-fughan ke liye tumhaare ishq se badh kar watan ki ulfat hai yahi hai turra-e-izzat har ek jawan ke liye wo kya karenge mohabbat hamare gulshan se jo dhundte hain chaman aur aashiyan ke liye chaman mein khar yahi puchhte hain phulon se bahaar aai hai kya sare gulistan ke liye fana-pazir hai phulon ka rang murgh-e-qafas hameshgi hai tere chashm-e-khun-fishan ke liye yahan se jaane ko hota nahin hai ji hargiz sarae kis ne sajai ye mehman ke liye