tere qalam se jo likkha hai wo hisab na de
mujhe shuur ata kar mujhe kitab na de

main is sadi mein to khamosh rah nahin sakta
abhi sawal sune ja abhi jawab na de

agar qubul kare to yahi dua hai meri
mera khuda mujhe jannat mein bhi sharab na de

rahe ye farq moazzin mein aur munafiq mein
jise azan na mile us ko aaftab na de

bade darakhton ki barakat se khub waqif hun
meri zamin mere bachchon ko ye azab na de

tamam umr ye aankhen sulagti rahti hain
mujhe to nind ata kar mujhe to khwab na de

tere hi ghar ke buzurgon mein jang jari hai
main kah raha tha ki yun dars-e-inqalab na de